தேட்டம்

தேடிக்கொண்டு போனேன்
ஒவ்வொருவரும்
வாங்க இதுதான் இறுதிநிலை
எப்படியோ வந்து சேர்ந்துட்டீங்க
’அவருக்கு’ நன்றி சொல்லுங்க
என்றனர்
தேடிக்கொண்டு போனேன்
வருகையில் வாழ்த்தியவர்கள்
கிளம்பும் பொழுது
சபிக்கத் தொடங்கினார்கள்
கெட்டொழியும் வழி
என்று கடுகடுத்தார்கள்
அவரு எதுலயும் நிலையில்லாதவரு
சும்மா ஓடுகாலி
என்ன பிரயோசனம்
ஒரு இடத்துல நிலைச்சு நிக்கணும்
சும்மா தேடிக்கிட்டே இருந்தா...
தேடிக்கொண்டே போனேன்
திறக்கும் கதவுகள்
திறக்கா கதவுகள்
மூடும் கதவுகள்
முறைக்கும் கதவுகள்
எல்லாவற்றையும் தாண்டி
இறுதிநிலை இதுதான்
என்று எங்கும் ஏக்கக் குரல்
ஐயோ உயிரினமே
முடிவதற்குப் பெயர் தேட்டம் இல்லை
என்னும் முதல்பாடத்தை ஏன் நீ கற்கவில்லை
இறுதிநிலை என்பதெல்லாம்
தேட்டத்தை விட்டு
வியாபாரத்தில் இறங்கிய
சௌகரியங்கள் அன்றோ
ஆட்டம் முடிப்பதற்குப்
பேசிவைத்துக் காசுபார்க்கும்
விளையாட்டன்று
உயிரின் பயணம்
தொடர்வதற்குப் பெயர்தான் தேட்டம்
முடித்துக்கொள்வது
அவரவர் சௌகரியம்.


***