மாக்ஸ் முல்லர்

நூறாண்டுத் தவம் கிடந்து 
முத்தி நோற்ற முதிர்சுவையில் 
எதிர்க்கரையில் பழுத்து 
இக்கரைக்கு ஏங்கிய 
அக்கறையே ஊட்டமாய்த் திரண்ட 
ஞானக்கனி 
ஓடு விதை உள்பருப்பு 
கோதனைத்தும் தீஞ்சுவையாய்த் 
திரள்பயனாய் 
உருண்ட கனியில் 
ஏதோ ஒரு பகுதியில் 
ஊசிமுனைக் குத்திடத்தின் 
ஒரு நாலு பங்கில் ஒரு பங்களவு 
சிறிய புள்ளி சரியில்லை என்றாய் 

சரிதான். உன்னைக் கனியுண்பவன் 

என்று தவறாக நினைத்துவிட்டேன் 
மற்ற பகுதியெல்லாம் 
மாமருந்து என்று கூறி 
நண்பனிடம் கொடுத்த கனி 
அவன் கை கனக்கத் 
திருப்பித் தந்ததை 
இங்கேதான் எங்கோ வைத்தேன் 
எங்கே என்றறிந்தால் சொல்லும்

***