அமேசான்

அமேசான் அடர்ந்து ஆழ்ந்து கனத்த கானம்.
அடித்தடம் புரியாத ஆரண்யம்.
ஒரு கிளையில் பல உயிரினம், பல குடும்பம்
ஒரு மரமோ ஜீவராசிகளின் வகை உலகம்
ஊர்வன பறப்பன தாவுவன தொங்குவன தாண்டுவன
கூவுவன உறுமுவன காறுவன சீறுவன கத்துவன ஓலிடுவன
இன்னபல மருகும் வனப் பெருக்கம்.
பச்சைப் பசும் இலை பார்வைக்கு ரம்மியம் உண்டால் விடம்
விட இலை உண்டு வாழும் கட்டாயம்
விதை ஓட்டில் விடம்
கவனமாய் உடைத்துண்ணும் கிளிகள்
ஆயினும் அவற்றினுள் விடம் புகும்
’விடமுண்ட கண்டர்’ பலர்
விரைந்து நாடும் மருந்தாய்க்
குழைந்த களிமண் முறிக்கும்
அதிலும் ஒரோவகை தேடி உணல் வேண்டும்.
இலையெனில் விடமேறி வாழ்வு சாம்பிப் பொன்றும்.
எங்கும் பெருக்கம் ஒவ்வொன்றிலும் அபாயம்
விடமுறிவுக் களிமண் அசந்துண்ட மந்தியை
ரகசியப் புலி தாக்கும்
ஈன்ற குட்டியைப் புரக்கும் தாய்
தேடும் உணவின் வழியில் உயிர் துறக்கும்
முட்டை பொரித்தவை
பொரிப்பதற்குள் மற்றவை தின்றவை போக
எஞ்சியன பிழைக்கும்
அஞ்சி அஞ்சித்தான்
அக்கணம் ஒவ்வொன்றும் வாழ்வு ஊரும்
யோகம் பயின்று உடல் நிறுத்தி
மீண்டும் உயிர்க்கும் சில
ஒன்றின் வாய் தாண்டி ஒன்று தப்பும்
’வாய்மை’யில் விழுந்தவை மறக்கும்
உணவென்றும் கழிவென்றும் இல்லா
ஒரு பெரும் சுழற்சி
உயிர் ராட்டினம். 

*