அந்தி

அந்தி
மேலைத் திசையெங்கும்
நீண்டு நிவந்து ஓங்கிப் பரந்த மலைத்தொடர்
பருவங்கள் பலவற்றை
ஒரே நேரத்தில் தொட்டிலாட்டும்
அங்கங்கே விண்முட்டும் சிகரங்கள்
பருவங்கள் கொடுமையாய்ச்
செங்குத்தாய் மாறும்
குறுகிய கால இடைப்போது
நடுநடுவே புவியடுப்பில்
சுட்டெரிக்கும் கொதிநீர்
ஓரடி எடுத்து வைத்தால்
அப்புறமோ உறைபனி
இரண்டின் இடைக்கோட்டில் நின்றே
உயிர்கள் தம்மைப் பேணும்
மயிரிழை, தப்படி, தடுக்கிவிழல்
ஒன்று கொதி மரணம்
அல்லது உறைமரணம்
ஆபத்தின் இடைகழியில்
ஜீவித ரேகை.
செல்லும் நதியும்
சமயத்தில் உறைந்து விடும்
துள்ளும் உணவும்
பனிக்கடியில் மறைந்துவிடும்
உணவுக்கேங்கி உறைபனி குத்தும்
புள்கூட பனிப்படுகை பொன்றிவிடும்
ஓடியதும் விரட்டியதும் ஒன்றாய்ச் சாகும்
வெப்பம் வந்து உருக்கியதும்
தேடி அவை சுவைக்கத்
தேடி வரும் விலங்கு
நோட்டம் இட்டு வரும் பூதக் கழுகு
காலம் இவற்றுக்குக்
கடிகாரம் திருகி வைக்கும்
ஓலமிட்டு என்ன பயன் என்றே
ஒன்றிற்கொன்று உணவாகி
ஒரு கால நதியில்
நுழைந்து வெளியாகி
உயிர் மரணம் என்ற இசை
உருவாகும்
இசை மீட்டும் ஒன்றும்
இசை கேட்கும் ஒன்றும்
இல்லை என்ற திரை விட்டுப்
பின்னால்
மெல்ல சிரிக்கின்ற மர்மம்
அல்லின் நாப்பண் புலனாகும். 

*