வாழ்க்கை ஒரு சீட்டுக்கட்டு விளையாட்டு
கைநிறையச் சீட்டுகள்
பார்க்கின்ற கைகளுடன்
பழகுகின்ற கைகளுடன்
கடந்து போகும் கைகளுடன் எல்லாம்
விளையாடித் தீர வேண்டிய
நிர்பந்த விளையாட்டு.
எந்தச் சீட்டை இறக்குவது என்று
நாம் தீர்மானிக்கும் முன்னரே
நம்மைத் தீர்மானிக்க விடாமல்
நம் தீர்மானத்தை ஒதுக்கியும்
பக்கத்தில் தலையில் பின்னால்
கையிடுக்களில் எல்லாம் தலை விட்டுக்கொண்டு
நமக்குப் பதிலாகப் பிராக்ஸி ஆடுகின்றனர்
பித்ருக்கள், பெற்றோர், மூத்தோர், முந்தையர்
இதுவரை இருந்து மறைந்த அத்தனை பேரும்
மொத்தக் குடியிருப்பு மண்டை ஓட்டிற்குள்!
தோற்றால் நம் தலையில் போட்டு உடைக்க வேண்டியது
ஜயித்தால் நாம் அவர்கள் காலில் விழ வேண்டியது!
என்ன எழவு ஆட்டம் இது!
என்னை ஆக்கிரமித்து ஊடுருவி
ஒட்டுமொத்த ஆவிகளும்
ரவுண்டுக்கு மேல் ரவுண்டு கட்டி ஆட
ஒதுக்குப் புறமாய் ஓரத்தில் பலியாய்
பிதுங்கிய விழியின் பாவைக்குள் நான்!
எடுத்துக் கடாசித் தோற்றுவிட்டு
உய்யலாலா ஆநந்தக் களிப்பு
ஆடுதல்தான் தப்பிக்கும் வழியோ...
***
No comments:
Post a Comment